काठमाडौं उपत्यकामा समुदायस्तरमा कोरोना संक्रमण फैलिएको छैन: स्वास्थ्य मन्त्रालय

July 17, 2020 |Pahiloclick

काठमाडौं: स्वास्थ्य तथा जनसंख्या मन्त्रालयले काठमाडौं उपत्यकामा समुदायस्तरमा कोरोना भाइरसको संक्रमण नफैलिएको दाबी गरेको छ ।

स्वास्थ्य मन्त्रालयका प्रवक्ता डा जागेश्वर गौतमले नियमित लाइभ अपडेट मार्फत काठमाडौं उपत्यकाको समुदायमा कोरोना संक्रमण नफैलिएको बताएका हुन् ।

डा गौतमका अनुसार काठमाडौं उपत्यकामा कोरोना संक्रमणको अवस्था हेर्न स्वास्थ्य मन्त्रालयले उपत्यकाका विभिन्न स्थानमा ४ हजार ८ सय जनाको नमुना परीक्षण गरेको जनाएको छ ।

उक्त परीक्षणको नतिजाले काठमाडौंमा समुदायमा कोरोना संक्रमण नफैलिएको देखिएको प्रवक्ता गौतमले बताए ।

‘काठमाडौं उपत्यका भित्र गरिएको समुदायस्तरको भीडभाड हुने विभिन्न स्थानहरुमा परीक्षणका क्रममा ४ हजार ८ सय जनाको नमुना संकलन गरिएकोमा आजको नतिजाहरुले काठमाडौंमा समुदायस्तरमा कोरोना संक्रमण देखिएको छैन भन्ने तथ्यंलाई प्रष्ट पारेको छ,’ डा गौतमले भने, ‘अन्य तथ्य र प्रमाणहरुले समुदायमा कोरोना संक्रमण छ भन्ने कुरालाई कहीँ कतै सहयोग गरेको पाइएको छैन ।’

डा गौतमले काठमाडौं उपत्यकामा समुदाय स्तरमा गरिएको परीक्षणबाट ३ जनामा कोरोना संक्रमण भने पुष्टि भएको बताए ।

जसमध्ये २ जना बिदेशबाट आएका व्यक्ति र एकजना ब्युटि पार्लरमा काम गर्ने व्यक्ति भएको डा गौतमको भनाइ छ ।

डा गौतमले कोरोना संक्रमणबाट बच्न र बचाउँन सबै सचेत हुनुपर्ने पनि बताए । उनले कोरोना भाइरसको संक्रमण दर कम भए पनि जोखिम कम नभएको बताए ।

उनले लकडाउन खुकुलो भएसँगै बजार तथा सडक जनस्वास्थ्यका लागि जोखिम बढिरहेको पनि बताए ।

डा गौतमले कोभिड संक्रमणको अवस्थाभन्दा अगाडिको समय जस्तो अवस्था अहिले नभएको पनि बताए । उनले कोरोना संक्रमणको जोखिमबाट सहज अवस्थामा आउन अझै समय लाग्ने पनि बताए ।

उनले धेरै भिडभाड भएका स्थानमा कोरोना संक्रमणको जोखिम बढी हुने भएकाले उच्च सुरक्षा सतर्कता अपनाउन पनि आग्रह गरे ।