पोखरामा कोरोना संक्रमितको शव लैजानेक्रममा स्थानीयको अवरोध, प्रहरीद्धारा हवाई फायर, स्थिति तनावपूर्ण

June 25, 2020 |Pahiloclick

 

पोखरा : कोरोना संक्रमणबाट मृत्यु भएका व्यक्तिको शव व्यवस्थापनमा स्थानीयले अवरोध गरेपछि पोखरामा प्रहरीले हवाइ फायर गर्दा स्थिति तनावपूर्ण बनेको छ।

पश्चिमाञ्चल क्षेत्रीय अस्पताल पोखरामा उपचाररत कोरोना संक्रमित स्याङ्जाका ५५ वर्षीय पुरुषको हिजो बुधबार राति मृत्यु भएको थियो ।

उनको शव व्यवस्थापनका लागि लैजाने क्रममा पोखरा महानगरपालिका ३२ का मजुवावस्तीका स्थानीयले अवरोध गरेको जिल्ला प्रहरी कार्यालय कास्कीका प्रमुख एसपी जीवन श्रेष्ठले बताए।

उनका अनुसार अस्पतलाबाट शव व्यवस्थापनका लागि लैजाने क्रममा स्थानीयले सो टोलीमाथि ढुंगामुढा प्रहार गरेका थिए। सो टोलीले स्थानीयको अवरोधकाबीच शव व्यवस्थापन गरेको थियो।

प्रहरीले शव व्यवस्थापन गर्न थालेपछि स्थानीयहरुले नजिकै रहेको चेकपोस्टमा आक्रमण गरेपछि शसस्त्र प्रहरीका तर्फबाट ८ राउन्ड हवाइ फायर भएको एसपी श्रेष्ठले बताए।

‘स्थानीयहरुले शव व्यवस्थापनका लागि लैजाने क्रममा पनि प्रहरी टोलीमाथि ढुंगामुढा गर्नुभएको थियो’, एसपी श्रेष्ठले भने, ‘शव व्यवस्थापन गरेपछि उनीहरुले नजिकै रहेको चेकपोष्टमा ढुंगामुढा गर्न थाले सो क्रममा पीएफको टोलीले ८ राउन्ड हवाई फायर गरेको हो।’

यसअघि पनि मृत्यु भएका कोरोना संक्रमितको शव सोही स्थानमा व्यवस्थापन गरिएको थियो। त्यतिबेला पनि स्थानीयले अवरोध गरेका थिए।