सभामुखको निर्वाचन माघ १२ गते

January 20, 2020 |Pahiloclick

 

काठमाडौँ: माघ १२ मा रिक्त प्रतिनिधिसभाका सभामुखको निर्वाचन हुने भएको छ ।

 

सोमबार बसेको कार्यव्यवस्था समितिको बैठकमा दलहरुबीच सभामुखको निर्वाचन १२ माघमा गर्ने सहमति भएको हो । माघ ६ गतेपछि अर्को बैठक ६ दिनपछि अर्थात माघ १२ गते बोलाउने र त्यही दिन सभामुखको निर्वाचन गर्ने तयारी भएको छ ।

 

प्रतिनिधिसभाको आजै बस्ने दोस्रो बैठकमा प्रतिनिधि सभाका जेष्ठ सदस्यले आगामी बैठकमा सभामुखको निर्वाचन हुने सूचना पढेर सुनाउने तयारी भएको संसद सचिवालयले जनाएको छ ।

 

सोमबार दोस्रो बैठक अपरान्ह ४ बजे बोलाइएको छ । यसअघि संसदका जेष्ठ सदस्यका रूपमा प्रतिनिधि सभाको अध्यक्षता गर्न सांसद महन्थ ठाकुरले शपथ लिँदैछन् । राष्ट्रपति कार्यालय शीतलनिवास पुगेर शपथ लिएपछि उनकै अध्यक्षतामा सभामुख चयन प्रक्रिया अघि बढाइनेछ ।

 

सोमबार पहिलो बैठक राखेर नेकपाका तर्फबाट उपसभामुख बनेकी डा. शिवमाया तुम्बाहाम्फेले राजीनामा दिइसकेकी छन् ।