राष्ट्रिय झण्डा घरमा राखी संविधान दिवस मनाउन प्रधानमन्त्रीको आह्वान

August 21, 2019 |Pahiloclick

 

काठमाडौँ : प्रधानमन्त्री केपी शर्मा ओलीले यसपटकको संविधान तथा राष्ट्रिय दिवस भव्यता र व्यापकताका साथ मनाउन सबैमा आह्वान गरेका छन।

 

ठूलो बलिदान र सङ्घर्षबाट प्राप्त उपलब्धिका रूपमा संविधान आएकाले यो राष्ट्रव्यापी साझा दिवसको विशेषता, व्यापकता र भव्यता भएको उल्लेख गर्दै प्रधानमन्त्री ओलीले कसरी जनस्तरमै व्यापक बनाउन सकिन्छ, त्यसैगरी तयारी थाल्न निर्देशन दिएका छन ।

 

आज गृह मन्त्रालयमा आयोजित संविधान दिवस तथा राष्ट्रिय दिवस मूल समारोह समितिको बैठकलाई सम्बोधन गर्दै प्रधानमन्त्री ओलीले दिवसमा उद्योगी, व्यापारी, शिक्षक, कर्मचारीदेखि हरेक पसल र घरमा झण्डा होस्, हरेक गाडीमा झण्डा होस्, हरेक घरले दिपावली मनाओस्, बिजुली नभएका ठाउँमा पनि लस्करै टुकी बालेर रमाइलो होस्, भनेकाछन ।

 

संविधान जारी भएको दिन अधिकारको अवसर, सुरक्षा, सम्मान, समृद्धि र सुखद्तर्फको यात्रा भएकाले दिवस अठोट प्रतिबद्धता र सङ्कल्पको चाड भएको प्रधानमन्त्रीले स्मरण गरे।

 

प्रधानमन्त्री ओलीकै अध्यक्षतामा आज बसेको बैठकले असोज २, ३ र ४ गते संविधान तथा राष्ट्रिय दिवस भव्यताका साथ मनाउने निर्णयसमेत गरेको छ ।

 

त्यसका लागि भदौ २७ देखि नै तयारीका कार्यक्रम हुनेछन् । समितिले कागज र कपडाबाहेकका झण्डालाई निषेध गरेको छ ।

 

सङ्घीय लोकतान्त्रिक गणतन्त्रलाई अङ्गिकार गरेको संविधान ठूलो बलिदान, सङ्घर्ष, त्याग र उपलब्धिको निचोड हो भन्दै प्रधानमन्त्री ओलीले संविधानले विभिन्न समयमा भएका योगदानको अभिव्यक्त, जनधारणा र जनअभिमतलाई सम्बोधन गरेको बताए ।

 

हरेक व्यक्तिका अपेक्षा जस्ताको त्यस्तै सम्बोधन नगरे पनि साझा दस्तावेजका रूपमा बृहत्तर राष्ट्रहित, राष्ट्रिय आकांक्षालाई संविधानले समेटेको प्रधानमन्त्रीको भनाइ थियो ।

 

सहमतिको दस्तावेज भए पनि संविधानले हाम्रो इतिहास गौरवपूर्ण परम्परालाई अङ्गिकार गरी परम्पराको नाममा भएका अवैज्ञानिक पक्षलाई हटाएको बताउँदै संविधान जारी भएको दिन राष्ट्रिय उत्सव भएकाले सेनाको मात्रै दिवस भनेर नबस्न प्रधानमन्त्री ओलीले आग्रह गरे ।

 

सबै जनताको दिवसको रूपमा मनाउनुपर्नेमा जोड दिँदै उनले नेपालीको सबैभन्दा ठूलो चाड भएकाले राष्ट्रव्यापीरूपमा र विदेशमा बसेका नेपालीले समेत मनाउने साझा उत्सव हो, भनेका छन ।

ओलीले उक्त दिन झण्डा दिवसका रूपमा मनाउनुपर्नेमा जोड दिँदै झण्डामय बनाउन सबैलाई अनुरोधसमेत गरे ।

 

राष्ट्रिय झण्डालाई घरमा राख्न पाउने र सम्मानपूर्वक मुटुको अगाडि र पछाडि पर्ने गरी झण्डा भएको कपडा लगाएर राष्ट्रिय उत्सव मनाउन प्रधानमन्त्रीले आह्वान गरेका छन ।

 

झण्डाले राष्ट्रिय एकता र उपलब्धिलाई मौन ढङ्गले दृढतापूर्वक अभिव्यक्त गर्दै साझा अभिव्यक्ति, भावना र देशभक्ति बोल्ने भएकाले त्यो दिन सिंहदरबारमा उपस्थित भई सबै कर्मचारीले झण्डा बोकेर ¥यालीमा सहभागी हुने प्रधानमन्त्रीले विश्वास व्यक्त गरे ।

 

उहाँले त्यो दिन घर बिदा नभई उत्सव बिदा भएकाले हाजिरीको अभिलेख राखेर कर्मचारीलाई सहभागी गराउन आग्रह गरे ।

 

यस्ता उत्सवमा असामाजिक तत्वले अवसर छोप्नेतर्फ प्रधानमन्त्री ओलीले ध्यानाकर्षण गराउँदै सतर्कता अपनाउन सुरक्षा अधिकारीलाई आग्रह गरे ।

 

दिवस मनाउनका लागि विभिन्न उपसमितिसमेत बनाइएको छ । सो क्रममा गृहसचिव प्रेमकुमार राईले दिवसमा आयोजना हुने कार्यक्रमबारे पेश गर्नुभएको प्रस्ताव बैठकले पारित गरेको छ ।